السبت، 14 يونيو، 2008

13)إقتراح


سمعت عن إقتراح مقدم من بعض المدونات عن زواج المدونين للمدونات وفي رأي أنة إقتراح هايل جدا لأنة بيسهل مجال التعارف ويعمل على توحيد نقط الأهتمامات المشتركة , ولكن كيف يحدث ذلك فعليا دون إحراج لأي طرف؟.

1- أعتقد أنة لابد من إنعقاد مؤتمرات بصفة دورية ولتكن مثلا يومين من كل أسبوع.

2- مناقشة موضوع مهم للغاية وهو (أسباب وعوامل نجاح أو فشل فترة الخطوبة والتعارف).

3- كل فرد من الحاضرين سيتكلم عن خبراتة ليستفيد منة الجميع ,فهناك مدونين او مدونات لم يسبق لهم التعارف أو الأرتباط أو الخطوبة أو الزواج وربما سبق لهم شىء واحد مما ذكرتة منذ لحظة .

وأعتقد أن هذا الأسلوب يدخل في قلب الموضوع دون تزييف للحقائق لأنة ليس بين شخصين فقط ولكن أشخاص متعددين في الخبرات فبهذا يستنير العقل وتتعدد الخبرات ويلاحظ كل فرد الشخص الذي يشعر أن أسلوبة قريب منة في الحركة والطريقة والإلقاء وربما يكون مختلف في هذة الأشياء ويخلق الأعجاب بسبب الأختلاف أو التواؤم.

وأتمنى على من يجد أقتراحات أن يقول فكرتة أو نقده لهذا الموضوع واللة المستعان ....

وبعد كتابة هذا الموضوع سأجد في جريدة أهرام الجمعة في صفحة إعلانات مبوبة :

- مطلوب عدد 2 مأذون و2 مأذونة على ان يتوفر فيهم الشروط الأتية:

1- أن يكونوا خبرة بزواج المدونين بمالا يقل عن (10 سنوات).

2- أن يكون من أحد المدونين ومشترك في صالون أحمد الصباغ أو مشترك في كتاب مدونات مصرية للجيب(يفضل الأثنان معا).

3- يفضل على من يريد أن يلتحق بالعمل ألا يكون متزوج أو متزوجة والزواج من أحدى المدونين والمدونات فقط.

ترسل الطلبات على ص.ب 227\48 قهوة البورصة وسط البلد والطلبات على حساب صاحب القهوة.

أو على الأيميل : ELBORSA@CAFFE.com

39 Comments:

لماضة said...

طيب والمشاريب على مين
شكلها تدبيسه يا جدعان
عشان احنا اللى نحاسب في الاخر
وبعدين نسيق البورصة

sebofy7alo said...

لماضة
صاحب القهوة إن شاء اللة ومتحمليش هم كلة حيمشي حسب الخطة الموضوعة
هههههههههههه
ويجعلة عامر

نوره الخشن said...

طب ايه اجهز الفستان ولا ايه الكلام
فستان اللي هحضر بيه خطوبة حد من المدونين اه لحسن اتفهم غلط

sebofy7alo said...

نورة الخشن
اة حضري الفستان وخلية جاهز أول متسمعي زغاريد في المدونات تيجي على طول.
هههههههههههههههههه

appy said...

ههههههههههههههه

انت بجد مسخرة الله يخربيت شيطانك
بس بقولك ايه عاوزين نعين طاهر فى الموضوع ماشى بتاع البورصه ضرورى علشان هو يشرف على البوفيه
اقولك وكله يجى ماسك لاب توب فى ايديه
وعلى راى عبده الرايق نبارك فى الكومنتات وانا عنى نفسى هكتب الكتاب فى بوست ههههههههههههههههههههههه

sebofy7alo said...

appy
أيوة كدة عايز أفكار وفكر جديد أحنا جيل 2000 والبلوتوث والنت مش كدة برضة.
هههههههههههههههه

Ahmed Al-Sabbagh said...

ههههههههههههههههههههههههه

طب بالنسبة للأولاد

هيجوا عن طريق الكومنتات ولا ايه ؟؟

هههههههههههههههههه

بوست جامد جدا جدا جدا

احمد

نوره الخشن ــ آي و كفاية said...

طب حلو بس الفرح بئى هيبئى على مين بالظبط يعني اقصد هنحضرو فمدونة العروسة ولا العريس
اقولك نعملو اسلامي المدونين يروحو للعريس والمدونات يروحو عند العروسة
ايه رأيك؟؟؟؟؟؟؟؟؟؟

نوره الخشن ــ آي و كفاية said...

كلمة للصباغ بمناسبة المواليد

ايه رأيك نعمل مدون اسمها السجل المدني بالمرة

لماضة said...

ههههههههههههه
دي شكلها هتقلب بجد
يجعله عامر بحسك يا شيكو

بطوط حبوب said...

طب سجل اسمى عندك
ههههههههههههههه

sebofy7alo said...

Ahmed
العيال حيجوا مع الطلبات وانت في القهوة , وعندك عيلين سادة والتالت السكر برة.
هههههههههههههههههههه

نورة الخشن
فكرة جامدة طحن وكمان يخدوا ثواب.

لماضة
شفتي بقى الشغل بس نفسك معانا..

بطوط حبوب
أسمك أضاف مبروك جالك ولد على السريع .
هههههههههههههه

بنوته مصرية said...

ههههههههههههههههههههههه

فكره حلوه

طيب وليلة الزفاف يا ترا فين علي المسنجر ولا غرفة خاصة في شات ههههههههههههههه

طيب اكتب اسم بنتي اهو احجز لها

يا سلام علي افكارك هههههههههههههه

شمس said...

هههههه

بجد جميلة

راسن فى الحلال عمل انسانى

تحياتى

dodda said...

ايه بقى نظام التدبيس ده؟؟؟

انت مشفتش حال المدونين وال ايه؟؟؟
شكلك كده حتعمل وثيقة الجواز فى بوست

والمهر والشبكه تاج..
ويفتحوا المدونتين على بعض
عشان البراح مطلوب!!

sebofy7alo said...

بنوتة مصرية
تم تسجيل الأسم بنجاح وجاري البحث عن عريس مدون مطابق لمواصفتها (أبقوا معنا).
ههههههههههههه
أحتمال تبقى غرفة خاصة بس على الأسكاي بي يعني حيفسحها برة (حاجة جديدة يعني)
ههههههههه


شمس
مرسي ليك وكلة بثوابة مش كدة برضة
نورت المدونة
تحياتي

dodda
أنت بتقولي فيها طيب ولبية لاء دي فكرة جديدة برضة ههههههههههههههه
تحياني

ftafeet said...

يخرم جيبك ياشييييييخ ايه ده
حلو اوى الموضوع ده

ماليش دعوه ماتخلصوش العرسان قبل ماارجع مصر ونبى ونبى عايزه اتجوز بقى

الموضوع ده جه فى مصلحتى على فكره

اختارلى عريس انت بقى لحد ماانزل ماشى

هييييييييييه هانتجوز


nonaaaaa

sebofy7alo said...

ftafeet
ههههههههههههههههههههههه
طيب أحجزي أسمك في الكشف زي الناس اللي حجزوا ليهم وفية اللي حجز لأولادة
ههههه يمكن يبقى فية أخر واحد ولا حاجة
وتيجي بالسلامة

لماضة said...

امممممم
طيب انا شاركت في الحمله بموضوع
تعاطفك لوحده مش كفايه

سنووايت said...

ههههههههههههه

زواج عتريس من فؤادة بااااااطل
وطبعا هيتم فرض ضرايب مأذونية علي بلوجر , وتكون مراسم كتب الكتاب علي مدونة أفراحنا بحضور نخبة من ألمع المدونين والمدونات.

اقتراح غريب , بس الموضوع جميل :)
وعجبني اوي جزء الاعلانات المبوبة

šσяšαяαα said...

تارارارا تيرارارا تارارارارارارار
دى موسيقى تصويرية بس لزوم التدوينة

ياسلام بقى لما نتخيل كدا الارتباط التدوينى دا بم ان اصله الكترونات

اول كيوبيد هيكون buzz عالياهو
والمقابلات الرسمية هتكون فى شات رومز
والخطوبة تكون عن العروسة عالميل بتاعها زى ماهو متبع فى العادات والتقاليد
وكتب الكتاب هيكون عن طريق مأذون آلى يردد الكلام آليا والعرسان تقول وراه عن طريق المايك طبعا
والفرح يكون فى الشات روم طبعا اللى كان اللقاء فيها على اساس انها كانت المكان الاول لكيوبيد
والشربات بقى يتبعت فى اتاتش عالميل
واحلى حاجة بقى ان مفيش حد هينقط العرسان بم اننا غلابة ملناش فى الفيزا كارد
ــــــــــــــــــــ

طيب بعيدا عن الغلاسة دى
هو الاقتراح مش بطال خالص لانه اى مدون او مدونة بيعبروا عن الثقافة والمجتمع اللى عايشين فيه من خلال تدويناتهم
ودا عنصر كويس جدا كتعارف مبدأى بين المدونين وبالتالى بيقدروا يعرفوا مين المدونين اللى متوافقين معاهم فى الاراء والافكار
وبالتالى برضو العنصر دا هيوفر مقدمات كتير ممكن ناس ماتكنش بتفضلها زى المقابلات الشخصية اللى اصبحت حاجة اساسية قال ايه يعنى عشان يتعرفوا على شخصيات بعض.. امال الخطوبة بتعمل ايه مش عارفه.. ماعلينااااا

وبس كفاية كدا احسن تفتكروا انى رغاية واللا حاجة لاسمح الله:)

Soooo said...

اعتقد ان لو ده حصل بجد يعني .. يبقى تغطية موضوع الخطوبه هتكون في مدونة العروسه .. بينما تغطية اخبار الفرح هتكون عند العريس
حياتهم بقى مش هتكون متغطيه خالص
دي هتنتشر في عالم التدوين كللو


ملحوظه
اعتقد ان لو العرسان اضايقو من ولد من ولادهم .. هيعملو ديليت للحوار كللو

ولو عايزين يخلو الموضوع في السر .. يعملو مدونه تجمعه هم بس

اما بقى لو عاملين عزومه لصحابهم بس .. يقفلو التعليق او يخلوه للمدونين بس


يالهوووووووووووي
ده في كمية إفيهات بنت لذينا تطلع في الحوار ده يا جرعاااااااان


ملحوظه
انا جيتلك كزا مره بس ماعرفتش اعلق
دلوقتي بس اديني علقت اهو



سلامووووووووووز

kochia said...

واضح ان المنطقة دي فيها افكار كويسة
انا هبقي اجي هنا كتير بقي

تحياتي

المـــفـــــــقــــــــوعـــــة مــرارتـهــا said...

من غير لف ولا دوران
مايلزمكش عروسة
جد شوية
رأيك أيه في الفكرة دي ؟
انا عاجباني جدا علي فكرة
لاني مستخسرة الشباب والبنات اللي ذي الورد اللي شفتهم يوم توقيع الكتاب يتجوزوا من برة الأسرة التدوينية
هذه الأسرة الجميلة
التي يستحق فتيااتها وشبابها الأحسن دائماً

خاطبة المدونات said...

نريد متطوعون لإنجاح فكرة المدونة
ومن يجد في نفسه حب الخير فليتفضل
elkhatbah60@yahoo.com

كاتب مصري said...

تحيتي
الصراحة لم أقرأ البوست لأني الآن على عجل ولكنني سأعود حتما لأقرأه وأضع تعليقي
هذه المرة الأولى لي هنا وأحب أن أدعوك بدعوة مصحوبة بالفل والياسمين لزيارة مدونتي آملا أن لا أرد دون إجابة الدعوة ..
أنتظر زيارتك وتعليقك قريبا..أظنها ستروق لك
تحيتي
مدونتي هناhttp://kanyatklam.blogspot.com/

enjy said...

حلوة فكرة زواج المدونين دول واهو يبقى زيتنا فى بتنجانا بردو وناخد بلوج اوضتين وصالة ونكتب الكتاب فى بوست لذيذ ونعمل الفرح اون لاين والمعازيم يعملوا ساين ان قبل دخول الفرح والزفة تبقى ريل بلاير والهدايا كل واحد يجيب معاه تاج.........
ايه رايك فى الاقتراحات المثمرة دى؟؟؟؟

زى الهوا said...

هههههههههههههههههههه , يعنى العرايس مدونين والمعازيم مدونين والمأذون مدون , فكرة حلوة موت , انا عايزة ابقى اتعزم إن شاء الله


بوست جامد جامد يعنى ( وش محول )

mohammed alsha3r said...

سيبو في حالو

ازيك

اقتراحك جميل

واحييك على خفه دمك

حنين.. said...

هههههههههههههههههههههههههههههه والله انا بحييك على الفكره دى, بجد انا لما بقرا المدونات والمدونين بقول خسارة يتجوازا كدا,ههههههههههههههههه بجد فكره حلوه بحييك على المدونه,,,,,, تقبل مررورى

nanosa said...

السلام عليكم
انا كل اللي عاوزة اعرفه ..هو مين اللي قالك علي الاقتراح ده
وبالنسبه انه عاجبني او بمعني اصح رأيي فيه
فانا مش عارفة ..بس احساس مش حلو لما تكون رايح مكان وانت عارف انك رايح تدور علي نصك التاني
لان من وجهه نظري الحب ده جماله ف صدفته

وبالنسبة للحساب .. فالحساب يجمع..ههههه


لك خالص تحياتي .. وتبهرنا دايماً بمواضيعك ..واسفة للاطالة

ِِAdem El-Mahdy said...

السلام عليكم

ازيك يا عمنا وحشنى جداا

انا شايف لو الموضوع مفيهوش حاجة شرعية
يبقى اوك

لكن بقى لو واحد مدون عاجبه واحده مدونة يعدوا مع بعض على الميل يجى 6 شهور يدرسوا فى اخلاث بعض و شخصيات بعض و الاخر الموضوع فوركيشن

يبقى دا
نوووووووووووووووووووو

و بس

رئـــــيسـة حزب الأحلام said...

الموضوع جميل بس عايز ناس اهل للثقة انهم ينفذوا الموضوع والناس المهرجه تبتعد ومااكثرهم والخوف هيبقى منهم
لكن لو ناس محترمه زى اللى شفناهم فى لقاء المدونين بجد هيبقى جميل
تحياتى لك

shasha said...

والهى فكرة ليه لا

sebofy7alo said...

طيب يالا بقى شدوا حيلكم شوية عايزين نفرح مين اللي حنجرب فية ولا نعمل قرعة؟؟؟؟

هيثم الدهشان said...

ماشى انا موافق اكون مأذون بس على شرط انا اللى اقول مين مع مين
وبعدين خد هناهتسيب طاهر يحاسب على المشاريب يا جدع هو اخر كل واحد كوباية ميه من الحنفية مش معدنية
كده نبقى متفقين يا عم

غير معرف said...

هاى شريف
افكارك تجنن بس والله وجهة نظر بردوا
شيرين العقاد

dina said...

انا اول مرة اسمع عن الموضوع دا و هو شبه شوية جواز الشات و الحاجات دى..و الله انا بقول الجواز دا قسمة و نصيب و زى البطيخة كدا و الحلو انه ييجى من غير تخطيط ولا اجتماعات
تحياتى

ojg said...

عارف ساعتها
جوجل هتغلي المدونات
وابو العروسة يطلب مدونة بلوج سبوت مش نت لوج وتكون تمليك مش ايجار
واصلا اصلا العدادات والحاجات اللي احنا هاريين بيها المدونة هتبقى بفلوس واحتمااال تبقى ع العروسة
:s
لا يا عم يفتح الله
هتغلوا علينا التدوين
ومش هنطول حاجه في الآخر
مش هنتجوز وراضيين
انما مش هندون كمان؟؟؟
ودي تبقى عيشة يا جدعااان؟؟؟

blogger templates 3 columns | Make Money Online